ਸਾਊਥਾਲ (ਕਾਂਡ 60)

       ਜਗਮੋਹਣ ਬਾਰੇ ਰਿਸ਼ਤੇਦਾਰਾਂ ਵਿਚ ਆਮ ਰਾਏ ਹੈ ਕਿ ਉਹ ਮਿਹਨਤੀ ਬੰਦਾ ਨਹੀਂ ਹੈ। ਮਨਦੀਪ ਦਾ ਪਿਤਾ ਕਹਿਣ ਲੱਗਦਾ ਹੈ ਕਿ ਜਿਵੇਂ ਉਹ ਪੜ੍ਹਿਆ ਲਿਖਿਆ ਸੀ ਤੇ ਹੁਸ਼ਿਆਰ ਵੀ ਸੀ ਭਾਵੇਂ ਜਿੰਨੇ ਮਰਜ਼ੀ ਪੈਸੇ ਕਮਾ ਲੈਂਦਾ ਕੋਈ ਹੋਰ ਨੌਕਰੀ ਲਭਦਾ, ਹੋਰ ਪੜ੍ਹ ਲੈਂਦਾ। ਇਸ ਜੌਬ ਵਿਚ ਤਨਖਾਹ ਭਾਵੇਂ ਘਟ ਹੈ ਪਰ ਓਵਰ ਟਾਈਮ ਬਹੁਤ ਮਿਲਦਾ ਹੈ ਪਰ ਜਗਮੋਹਨ ਤਾਂ ਓਵਰਟਾਈਮ ਤੱਕ ਲਾ ਕੇ ਖੁਸ਼ ਨਹੀਂ ਹੈ। ਆਪਣੇ ਅੱਠ ਘੰਟੇ ਹੀ ਮਸਾਂ ਪੂਰੇ ਕਰਦਾ ਹੈ। ਪਰਦੁੱਮਣ ਸਿੰਘ ਵੀ ਇਵੇਂ ਹੀ ਸੋਚਦਾ ਹੈ ਉਸ ਬਾਰੇ। ਪਰਦੁੱਮਣ ਦਾ ਕਹਿਣਾ ਹੈ ਕਿ ਜਿੰਨੀ ਜਗਮੋਹਨ ਦੀ ਸਮਰਥਾ ਹੈ ਉਹ ਉਸ ਦੀ ਪੂਰੀ ਵਰਤੋਂ ਨਹੀਂ ਕਾਰ ਰਿਹਾ। ਮਨਦੀਪ ਦੇ ਵੀ ਕੁਝ ਅਜਿਹੇ ਹੀ ਵਿਚਾਰ ਹਨ ਪਰ ਉਹ ਕਦੇ ਇਸ ਗੱਲ ਦਾ ਜ਼ਿਕਰ ਨਹੀਂ ਕਰਦੀ ਕਿਉਂਕਿ ਉਹ ਖੁਸ਼ ਹੈ। ਜਗਮੋਹਣ ਉਸ ਨੂੰ ਕਿਸੇ ਗੱਲੋਂ ਤੰਗ ਨਹੀਂ ਕਰਿਆ ਕਰਦਾ। ਫਿਰ ਵੀ ਕਦੇ ਕਦੇ ਉਹ ਵੀ ਕਹਿਣ ਲੱਗਦੀ ਹੈ ਕਿ ਫਲਾਣੇ ਰਿਸ਼ਤੇਦਾਰ ਨੇ ਮਰਸਡੀਜ਼ ਖਰੀਦ ਲਈ ਜਾਂ ਫਲਾਣੇ ਨੇ ਵੱਡਾ ਘਰ ਲੈ ਲਿਆ ਪਰ ਜਗਮੋਹਣ ਕੰਨ ਵਲੇਟ ਰੱਖਦਾ ਹੈ।