ਸਾਊਥਾਲ (ਕਾਂਡ 53)

       ਸਕੌਟ ਐਵੇਨਿਊ ਉਪਰ ਪੁਲਿਸ ਦੀਆਂ ਕਾਰਾਂ ਹੀ ਕਾਰਾਂ ਹਨ। ਇਕ ਐਂਬੂਲੈਂਸ ਵੀ ਖੜੀ ਹੈ। ਸਕੌਟ ਐਵੇਨਿਊ ਪਾਰਕ ਰੋਡ ਤੇ ਕੈਸਲ ਐਵੇਨਿਊ ਨੂੰ ਮਿਲਾਉਂਦੀ ਹੈ। ਸਵੇਰੇ ਫੈਕਟਰੀ ਜਾਣ ਲਈ ਪਰਦੁੱਮਣ ਸਿੰਘ ਪਾਰਕ ਰੋਡ ਉਪਰੋਂ ਦੀ ਹੀ ਲੰਘ ਕੇ ਜਾਂਦਾ ਤੇ ਆਉਂਦਾ ਹੈ। ਪੁਲਿਸ ਦੀਆਂ ਕਾਰਾਂ ਕਾਰਨ ਸਕੌਟ ਐਵੇਨਿਊ ਬੰਦ ਕੀਤੀ ਹੋਈ ਹੈ। ਪਰਦੁੱਮਣ ਸਿੰਘ ਤੇ ਗਿਆਨ ਕੌਰ ਫੈਕਟਰੀ ਤੋਂ ਘਰ ਨੂੰ ਜਾ ਰਹੇ ਹਨ। ਉਹ ਕਹਿੰਦਾ ਹੈ,
“ਕੋਈ ਵੱਡਾ ਕਾਰਾ ਹੋਇਆ ਲੱਗਦੈ।”
       ਗਿਆਨ ਕੌਰ ਕੁਝ ਨਹੀਂ ਬੋਲਦੀ ਤੇ ਕਾਰਾਂ ਵੱਲ ਦੇਖਦੀ ਰਹਿੰਦੀ ਹੈ। ਉਹ ਦਿਨ ਭਰ ਦੇ ਕੰਮ ਨਾਲ ਥੱਕੀ ਪਈ ਹੈ। ਪਰਦੁੱਮਣ ਸਿੰਘ ਫਿਰ ਆਖਣ ਲੱਗਦਾ ਹੈ,
“ਕੁਲਬੀਰੋ ਵੀ ਇਸੇ ਰੋਡ 'ਤੇ ਈ ਰਹਿੰਦੀ ਐ ਨਾ ?”
“ਹਾਂ, ਬਹੱਤਰ ਨੰਬਰ 'ਚ।”