ਰੇਡੀਓ ਉਪਰ ਖਬਰ ਆ ਰਹੀ ਹੈ ਕਿ ਸਾਊਥਾਲ ਵਿਚ ਕਤਲ ਹੋ ਗਿਆ ਹੈ। ਲੋਕ ਧਿਆਨ ਨਾਲ ਖਬਰ ਸੁਣ ਰਹੇ ਹਨ ਤੇ ਫਿਰ ਇਕ ਦੂਜੇ ਵੱਲ ਭੇਦਭਰੀ ਨਜ਼ਰ ਨਾਲ ਦੇਖਣ ਲੱਗਦੇ ਹਨ। ਜਗਮੋਹਣ ਕੰਮ ਉਪਰ ਹੈ। ਕੁਝ ਲੋਕ ਢਾਣੀ ਬਣਾ ਕੇ ਖੜੇ ਗੱਲਾਂ ਕਰ ਰਹੇ ਹਨ। ਜਗਮੋਹਣ ਕਾਹਲੀ ਜਿਹੇ ਕੋਲ ਦੀ ਲੰਘਣ ਲੰਘਦਾ ਹੈ। ਕੋਈ ਉਸ ਨੂੰ ਕਹਿੰਦਾ ਹੈ,
“ਜੱਗਿਆ, ਰਾਤੀਂ ਸਾਊਥਾਲ 'ਚ ਮਰਡਰ ਹੋ ਗਿਐ।”
“ਅੱਛਾ! ਹੁਣ ਸਾਊਥਾਲ ਵਿਚ ਮਰਡਰ ਵੀ ਆਮ ਜਿਹੀ ਗੱਲ ਹੋ ਗਈ।”
ਕਹਿੰਦਾ ਹੋਇਆ ਉਹ ਅੱਗੇ ਲੰਘ ਜਾਂਦਾ ਹੈ।
ਵਾਪਸ ਮੁੜਦਿਆਂ ਕਾਰ ਦੇ ਰੇਡੀਓ ਉਪਰ ਫਿਰ ਉਹੀ ਖਬਰ ਆ ਰਹੀ ਹੈ। ਉਹ ਸੋਚਣ ਲੱਗਦਾ ਹੈ ਕਿ ਐਡੀ ਕਿਹੜੀ ਗੱਲ ਹੋ ਗਈ ਇਸ ਕਤਲ ਵਿਚ। ਕੰਮ ਉਪਰ ਵੀ ਲੋਕ ਢਾਣੀ ਬਣਾ ਕੇ ਖੜੇ ਹਨ। ਉਹ ਧਿਆਨ ਨਾਲ ਸੁਣਦਾ ਹੈ। ਪਤਨੀ ਨੇ ਪਤੀ ਦਾ ਕਤਲ ਕਰ ਦਿੱਤਾ ਹੈ। ਉਹ ਮਨ ਵਿਚ ਹੀ ਕਹਿੰਦਾ ਹੈ ਕਿ ਇਹ ਦਿਲਚਸਪੀ ਵਾਲੀ ਗੱਲ ਜ਼ਰੂਰ ਹੈ ਨਹੀਂ ਤਾਂ ਪਤੀ ਹੀ ਪਤਨੀਆਂ ਦਾ ਕਤਲ ਕਰਦੇ ਆ ਰਹੇ ਹਨ। ਉਹ ਘਰ ਪੁੱਜਦਾ ਹੈ। ਮਨਦੀਪ ਕਹਿੰਦੀ ਹੈ,
“ਸੁਣੀ ਅੱਜ ਦੀ ਖਬਰ?”